Presidentja e Kroacisë Kolinda Grabar-Kitarovië ka komentuar marrëdhëniet mes Kroacisë dhe Serbisë, në 26-vjetorin e çlirimit të Vukovarit nga duar e agresorit serb, pas betejës së përgjakshme të Luftës Atdhetare dhe rrethimit 3-mujor.
Duke folur për ndërtimin e marrëdhënieve ndërshtetërore midis Kroacisë dhe Serbisë, ajo tha se “shumë ujë do të rrjedhë në Danub përpara se Kroacia dhe Serbia të mund të thonë se janë shtete miqësore”.
Por deklarata e presidentes kroate duket se ka irrituar Beogradin, duke i cilësuar si provokim nga Kroacia.
Ndërkohë kujtojmë se beteja e Vukovarit është një nga betejat më të përgjakshme në historinë e Kroacisë. Për 87 ditë Vukovari, në Kroacinë lindore u rrethua nga Ushtria Popullore Jugosllave, mbështetur nga forca të ndryshme paramilitare nga Serbia.
Para luftës qyteti ishte një komuniteti i begatë, e kroatëve, serbëve dhe grupeve të tjera etnike. Por në vitin 1990, politikat nacionaliste, të ndjekura nga presidenti Sllobodan Millosheviç çuan në shpërthimin e një kryengritje të armatosur nga serbët e Kroacisë, të mbështetur nga qeveria serbe dhe grupet paramilitare.
Më 18 nëntor të vitit 1991, kur Vukovari ra, qindra ushtarë dhe civilë u masakruan nga forcat serbe. Gjithashtu rreth 31 mijë civilë u dëbuan nga qyteti dhe rrethinat e saj.
