Presidentja e Komisionit Evropian, Ursula von der Leyen është shprehur se në këtë kohë krize të shkaktuar nga koronavirusi, Evropa ka nevojë për një Plan Marshall.
Ajo i ka bërë thirrje vendeve të BE të investojnë miliarda në buxhetin e bllokut, për të shmangur pasojat katastrofike ekonomike.
Në një intervistë për gazetën “Welt am Sonntag”, Ursula von der Leyen tha se me “Planin Marshall” nënkupton programin e rimëkëmbjes të vendosur nga SHBA, në periudhën 1948-1952 për të ndihmuar ekonomitë e Evropës Perëndimore, pas Luftës së Dytë Botërore.
“Shumë miliarda që duhen investuar sot për të shmangur një katastrofë më të madhe, do t’i lidhin brezat së bashku”, tha ajo.
Edhe kryeministri i Spanjës, Pedro Sanchez bëri një thirrje të ngjashme disa javë më parë. Sanchez i kërkoi Evropës që të fillojë masa të menjëhershme ekonomike, sikur të angazhohen në një luftë.
“Evropa duhet të krijojë një ekonomi të kohës së luftës dhe të vendosë masa për mbrojtjen, rindërtimin dhe rimëkëmbjen ekonomike. Nëse virusi nuk njeh kufij, as mekanizmat e financimit nuk duhet t’i njohin. Të krijojmë shanse për rindërtimin e një Bashkimi Evropian shumë më të fortë”, tha Sanchez.
