Argjentina është duke kaluar një ndër momentet më të vështira, pas asaj shfaqje të shëmtuar në Botërorin e Rusisë. Pas dështimit në Kupën e Botës shumë lojtarë do të tërhiqen nga kombëtarja dhe është shkarkuar gjithashtu trajneri Sampaoli. Pritet të ketë një formatim të plotë dhe dilemë mbetet vetëm vendimi i Lionel Messit.
Presidenti i Federatës Argjentinase të Futbollit, Klaudio Tapia në një prononcim për mediat është shprehur se Leo është shumë i rëndësishëm për kombëtaren për anën financiare. Kjo deklaratë ka krijuar shumë debat në Argjentinë, pasi duket se federata është më e interesuar për të ardhurat sesa për aspektin futbollistik të skuadrës.
“Ne kemi një marrëdhënie të mire. Ai është në pushime dhe duke shijuar gjithçka me familjen e tij, nuk kemi folur fare rreth Kupës së Botës, duhet ta lëmë atë vetëm, le të mbledhë mendimet, të fillojë sezonin në Spanjë dhe të shohim se çfarë do të ndodhë vitin e ardhshëm.
Emocionalisht, kjo goditje duhet të ketë qenë shumë e vështirë për të, por Argjentina ka nevojë për atë. Nga pikëpamja financiare, Messi është shumë i rëndësishëm për AFA. Mendoj se Messi do të vazhdojë, ne kemi shumë besim tek ai”.-tha Klaudio Tapia.
