Presidenti polak ka dhënë një mesazh mbështetjeje të fortë për Ukrainën, gjatë fjalimit të parë personalisht të një lideri të huaj në parlamentin në Kiev, që nga fillimi i pushtimit rus.
Gjatë fjalimit të tij të dielën, Andrzej Duda falenderoi Ukrainën për mbrojtjen e Evropës kundër asaj që ai e quajti “imperializmi rus”.
“Bota e lirë”, tha ai, “ka fytyrën e Ukrainës”. Duda u shpreh se thirrjet e fundit që Kievi të negocionte me presidentin Putin, madje edhe t’i dorëzohej disa prej kërkesave të tij, ishin shqetësuese. “Asnjë vendim për të ardhmen tuaj nuk do të merret pa ju”, tha ai.
Polonia ka qenë një nga mbështetësit më të vendosur të Ukrainës, duke pranuar miliona refugjatë që ikën nga luftimet, dhe duke dërguar tanke dhe raketahedhës në ushtrinë ukrainase.
Duda, i cili mori duartrokitje të vazhdueshme pas fjalimit të tij, tha se Polonia do të bënte gjithçka që mundej për të ndihmuar Ukrainën të bashkohej me Bashkimin Evropian.
Burimi i lajmit: BBC. Përshtatur nga Tirana Today
