Eurodeputeti Fleckenstein ka zhvilluar një vizitë të paparalajmëruar në Tiranë.
Fleckenstein, së bashku me ambasadoren e BE-së, Romana Vlahutin kanë zhvilluar paraditen e sotme një takim me presidentin Meta.
Meta priti Fleckenstein dhe Vlahutin në Presidencë rreth orës 10:30 dhe zgjati rreth 45 minuta.
Pas takimit, Presidenca ka dhënë detaje, ku sqaron se në fokus të bisedimeve ishin avancimi i reformave me konsensus sa më të gjerë mes pozitës dhe opozitës, me qëllim integrimin e Shqipërisë në BE.
Gjithashtu, Presidenti Meta nënvizoi rëndësinë madhore që ka zbatimi i Reformës në Drejtësi, në veçanti ecuria e procesit të Vetingut.
NJOFTIMI I PRESIDENCËS:
Presidenti Meta zhvilloi një takim pune me Raportuesin e Parlamentit Evropian për Shqipërinë, Knut Fleckenstein. 18 shtator 2017 Presidenti i Republikës, Sh. T. Z. Ilir Meta priti sot dhe zhvilloi një takim pune me Raportuesin për Shqipërinë pranë Parlamentit Evropian, zotin Knut Fleckenstein.
“Avancimi i reformave gjithpërfshirëse dhe me konsensus sa më të gjerë mes pozitës dhe opozitës, me qëllim integrimin e Shqipërisë në Bashkimin Europian dhe mundësimi i një klime politike mirëbesimi dhe bashkëveprimi të ngushtë është shumë i rëndësishëm në këtë proces.” – u shpreh Presidenti Meta.
Presidenti i Republikës nënvizoi se një rëndësi madhore ka zbatimi i Reformës në Drejtësi, në veçanti ecuria e procesit të Vetingut, me synim krijimin sa më të shpejtë të institucioneve të reja të drejtësisë.
