Kryetarja e LSI-së Monika Kryemadhi i është bashkuar protestës së opozitës së bashkuar dhe përgjatë një prononcimi për mediat është shprehur se Rama duhet të largohet.
Madje Kryemadhi është përpjekur që “ta vendosë edhe në sedër”, duke përmendur faktin se ai është prind dhe duhet të sakrifikojë: “Jemi këtu për t’ju thënë që shumica e shqiptarëve janë kundër politikave të tij diskriminuese. Ta harrojë politikën, i them Ramës se është edhe baba, prindi për fëmijën e tij sakrifikon edhe jetën. Shqiptarëve iu duhet një alternativë e re ku të gjithë janë të barabartë. Për mua nuk ka rëndësi bëhen apo jo zgjedhjet, Rama duhet të ikë, është kryeministër me vota nga grupe të krimit të organizuar.”
Kujtojmë se pasditen e sotme Meta shfuqizoi dekretin për zgjedhjet vendore dhe e pyetur nëse ka ndikuar ajo vetë në vendimin e kreut të shtetit, Kryemadhi u shpreh se nuk ka ndikuar aspak.
“Nuk kam ndikuar fare, kam dy javë që nuk e kam takuar që kur jam operuar. Protesta do të vazhdojë, nuk ka dialog me Ramën që ka ardhur me votë ilegjitime. Sot protestojmë për demokracinë, fjalën e lirë, median e lirë, punën, padrejtësitë në gjykata”, u shpreh ajo.
