Pak ditë më parë presidenti i La Ligas bëri disa deklarata që tronditën ‘themelet’ e klubeve të mëdha të Evropës. Havier Tebas akuzoi PSG, Inter dhe Juventusin për transferime të paligjshme dhe se për këto UEFA nuk po bën asgjë. Por në qendër të këtyre deklaratave kanë qenë edhe klubet shqiptare.
Tebas i referohet dënimeve që UEFA bën sa i përket mosrespektimit të Fair Play Financiar, ku edhe Tirana pësoi një dënim të tillë dhe u bë publik në faqen e UEFA-s. Ai nuk e mbështet këtë veprim të institucionit më të lartë të futbollit, pasi beson se e keqja e futbollit në Europë po bëhet nga ekipet e mëdha.
“Nuk na shërben që të dënohen klubet shqiptare, të Republikës Çeke apo ndonjë turk. Industria e futbollit në Europë ka probleme të mëdha dhe është në rrezik”, ishin fjalët e tij.
“Duhet t’i bëjmë vetes pyetjen se pse disa klube fryjnë shifrat e transferimeve të lojtarëve. E kam fjalën për PSG, por edhe për Juventus që mori Ronaldon, apo Interin që nuk ka para, por i ofron shifra të çmendura Luka Modriç.
Transferimi i Neymar te PSG është një mashtrim. Vetë PSG është një mashtrim, ashtu si Manchester City”, ishin fjalët e tij duke kërkuar që UEFA të bëhej më aktive. Për këto deklarata, klube si PSG e Inter kanë vendosur të hapin çështje gjyqësore për shpifje dhe dëmtim imazhi presidentin e La Liga.
