Mesut Ozil është kthyer në temën më të diskutuar në mediat sportive ndërkombëtare. Pas vendimit të tij për tërheqjen nga kombëtarja gjermane dhe një lum akuzash për drejtuesit, se si e përdorën një fotografi mes tij dhe presidentit Erdogan për ta sulmuar. Ozil i akuzoi gjermanët edhe për racizëm ndaj tij dhe kjo shkoi në mënyrë direkte për drejtuesit e Federatës gjermane DFB.
Pak ditë pasi Ozil i dha lamtumirën kombëtares, Presidenti i Federatës Gjermane, Reinhard Grindel ka folur rreth kësaj cështje dhe ka pranuar se institucioni që ai drejton gaboi me këtë çështje. Në deklaratën e tij Grindel u shpreh:
“Ka pasur një abuzim dhe slogane raciste për atë foto. Si president, duhej ta kisha thënë me forcë atë që është evidente për mua personalisht dhe për ne si federatë: çdo deklaratë e karakterit racist është e pa tolerueshme dhe e papranueshme.”
Ozil deklaroi gjatë ditës së diel largimin e tij nga Kombëtarja gjermane, duke akuzuar presidentin e Federatës për mënyrën se si e ka trajtuar. Mesfushori gjermano turk është shprehur se: “Në sytë e Reinhard Grindel, presidentit të Federatës, unë jam gjerman kur fitojmë dhe një emigrant kur humbim.”
