Presidenti grek, Prokopis Pavlopoulos nuk ka ndërmend të tolerojë aspak në çështjen e emrit të Maqedonisë. Ai akuzoi sërish Maqedoninë për falsifikim të historisë dhe për shfrytëzim të emrit që nuk i takon teksa mbajti një fjalim në klubin e oficerëve në Selanik.
Jo vetëm kaq, por presidenti grek tha se Maqedoni ka qenë, është dhe do të mbetet greke.
Pavlopoulos mori pjesë në dy evente në Selanik, njëra për nderimin e mbrojtësit të qytetit “Shën Dimitri” dhe tjetra në shënimin e përvjetorit të lirisë.
Fjalimin e tij, Pavlopoulos e shfrytëzoi për të drejtuar kritika ndaj Maqedonisë, por edhe ndaj Turqisë dhe Shqipërisë.
“Nuk ka gjasa që të tolerojmë, kjo është e qartë dhe ne e kemi bërë me dije këtë. Nuk është vetëm falsifikim i historisë, sepse Maqedonia ishte, është dhe do të mbetet greke. Këtë e dinë të gjithë. Jo vetëm që nuk pranojmë falsifikim të historisë, nuk pranojmë as tensione irredentiste të cilat sërish do ta bënin Ballkanin, fuçi baruti në Evropë”, tha Pavlopoulos.
Presidenti grek tha se Greqia e mbështet perspektivën evropiane të të gjithë vendeve të Ballkanit, por konkretisht për Maqedoninë tha se duhet t’i respektojë të drejtat evropiane.
