“Ju duhet të luani fort dhe të fitoni në fushë, të tjerat, ku bën pjesë edhe premio, m’i lini mua në dorë”, – kështu u është drejtuar presidenti Demi lojtarëve, në mbledhjen me ekipin, në prag të ndeshjes Partizani – Kukësi.
Presidenti u ka premtuar premio lojtarëve, por pa dhënë shifra. Takimi u zhvillua në ambientet e hotelit të klubit, ku skuadra vijon të jetë e grumbulluar për këtë takim.
Të pranishëm kanë qenë të gjithë lojtarët dhe stafi teknik e drejtues i skuadrës. Presidenti Demi për disa minuta është njohur nga afër me gjendjen dhe atmosferën që po përjeton skuadra, në prag të përballjes më të rëndësishme të sezonit. Ai i ka transmetuar skuadrës mbështetjen maksimale, duke shpresuar edhe në fitoren e ekipit në ndeshjen ndaj Kukësit. Mbledhja ka qenë e qetë, ku nuk ka munguar optimizmi dhe batutat mes palëve.
Presidenti Demi e ka lënë të bardhë çekun e shpërblimit, pasi shifra mund të vendoset nga vetë lojtarët.
