8 qershori do të jetë dita e Florian Markut, ai do të zhvillojë ndeshjen e radhës në pallatin “Asllan Rusi” para mbështetësve shqiptarë për herë të parë ku përballë do të ketë serbin Sladjan Dragisic. Për të do të jetë një përballje e veçantë, sepse për herë të parë do të ngjitet në ring në kryeqytetin shqiptar. Në një intervistë për “Supersport” Marku është shprehur se do ta mposhtë serbin që në raundin e parë.
“Ndjehem shumë i lumtur që jam kthyer në atdhe dhe mezi e pres 8 qershorin për ndeshjen. Jam shumë i përgatitur për këtë sfidë, kam zhvilluar mbi 100 ndeshje por kjo do të jetë e veçantë pasi do të ndeshem në Tiranë. Kam dy muaj që përgatitem në Tajlandë, tani jam kthyer në Tiranë ku do të stërvitem edhe në ditët e fundit.”
Marku është një nga shqiptarët që premton një të ardhme të madhe në këtë sport dhe këtë e ka treguar edhe në duelet e tjera të MMA-së, ku ka dhuruar spektakël, por cili është sekreti i këtij suksesi:
“Zemra. Stërvitja e tepërt, gjithmonë kam pasur vullnet për stërvitje dhe e bëj që 12-vjeç. Jam shumë i lumtur për përkrahjen që më japin shqiptarët dhe kosovarët në çdo vend të botës, pasi ata nuk kanë munguar asnjëherë. Unë ju premtoj të gjithë shqiptarëve që un do të eci shumë lart në këtë sport, do ta ngre flamurin kuqezi shumë lart.”
Premtimi për përballjen me serbin nga Marku është i madh, ai shprehet se nëse Dragisic do të ndeshet ashtu si ka folur gjatë një interviste do ta hedh në tokë që në raundin e parë.
“Sa për ndeshjen ju them se serbi nuk është në nivelin tim dhe do ta mposht që në raundin e parë. Në një intervistë që kishte dhënë ishte shprehur se do të luftoj në këmbë, por nëse vërtetë vendos ashtu do ta hedh nokaut që në raundin e parë. Ai është shumë i mirë, por shumë larg nivelit tim, kurrë nuk ka pasur përballë një kundërshtarë kaq të përgatitur sa un.”
