Pas dy orësh kokë më kokë, pak çaste më parë ka përfunduar takimi i pedagogëve me ministren e Arsimit, Besa Shahini. Ky takim sipas pedagogut Mark Marku ka qenë pa rezultat, pasi ministrja nuk ka dhënë zgjidhje për asnjë nga kërkesat e tyre. Ai tha më tej se i kanë lënë një afat ministres deri në mbrëmje, për të hedhur hapat e mëtejshëm.
“Ne diskutuam për gjendjen në Universitet. dhe i qëndruam kërkesave tona, që kemi nxjerrë nga Asambleja. Nuk pati një qëndrim konkret nga ana e ministres, tentoi ta çojë diskutimin drejt një takimi jorezultativ.
Ne do të presim deri në darkë, dhe do të marrim më pas një vendim për hapat e mëtejshëm, ku do të mblidhet dhe Asambleja e pedagogëve. Ministrja nuk ka forcën e duhur, dhe nuk mori asnjë angazhim lidhur me kërkesat e tyre.
Ne biseduam deri në momentin e fundit për problemet, po nuk patëm zgjidhje. Ministrja u përpoq që të na mbushte mendjen për të mirat që do të sillte Pakti për Universitetin, gjë që ishte fyese për ne, pasi kuptojmë më shumë se vetë ajo. Studentët kanë protestën e tyre, dhe ne do të vijojmë qëndresën tonë”, tha Marku.
