Bisedimet për transferimin e Ronaldos tek Juventus, kanë filluar që pas 3 prillit, ku Cristiano shënoi atë gol spektakolar me roveshatë në Torino. Drejtori sportiv i bardhezinjve, Fabio Paratici zbulon se duartrokitja e tifozëve në drejtim të CR7 ishte çelësi i kësaj marrëveshje. Ai zbuloi të gjitha prapaskenat që sollën 33-vjeçarin portugez në Torino:
“Në ditët pas ndeshjes së Ligës së Kampioneve fola me menaxherin e tij, Jorge Mendes i cili më tregoi për emocionet e lojtarit për atë duartrokitje. Më tha ‘një ditë do të dëshironte të luante te Juventusi’ dhe unë iu përgjigja ‘një ditë…’ “, u shpreh drejtori sportiv.
Kontaktet mes drejtorit sportiv dhe agjentit të Ronaldos, Mendes vazhduan më gjatë, pasi Juventusi finalizoi edhe transferimin e Cancelos. Gjatë këtij transferimi të dyja palët kanë folur edhe për mundësitë për të finalizuar këtë transferim të madh.
“Mendes më shpjegoi situatën e Ronaldos. Unë fola me presidentin, pasi gjëja më e vështirë në këtë mes ishte që të bënim llogaritë ekonomike. Ai priti dy ditë e më pas më tha ‘vazhdo, provo të shohësh nëse ekziston vërtetë kjo mundësi dhe kështu ne vazhduam me procedurat deri sa arritëm në këtë përfundim”, përfundoi drejtori sportiv i Juventusit.
