Largimi i Maurizio Sarrit nga Napoli priteshe të kishte një revolucion edhe tek lojtarët, pasi disa yje ishin shumë të lidhur me të. Por Aurelio De Laurentiis bëri një lëvizje mjaft të zgjuar duke firmosur me trajnerin e madh Carlo Ancelottin. Emërimi në krye të napolitanëve, i një trajneri me mjaft eksperiencë në arenën ndërkombëtare dhe nga ata me më shumë tituj të fituar, ka bërë që në ambientin e të kaltërve të rikthehet entuziazmi.
I pari që bëri prapakthehu ishte kapiteni Marek Hamsik, që pak ditë më parë doli publikisht dhe kërkoi largimin, duke synuar një tjetër eksperiencë. “Kam folur me Ancelottin dhe kemi vendosur që të qëndroj. Është një trajner i shkëlqyer dhe mezi pres të fillojmë përgatitjen nën urdhrat e tij”, tha Hamsik.
Në të njëjtën linjë ishte edhe belgu Dries Mertens, i cili ka qenë nga më të kërkuarit në merkato, ndërsa ka pasur edhe një klauzolë qesharake, vetëm 28 milionë euro. “Ancelotti më telefonoi dhe më kërkoi në mënyrë bindëse që të rri akoma te Napoli. I kam dhënë fjalën se do të vijoj të qëndroj në skuadër, ndërsa tani pres të të kthehem pas Botërorit, për të kontribuar për titullin kampion te Napoli”, u shpreh belgu.
Mediat napolitane raportojnë se tashmë shumë futbollistë janë të bindur se skuadra do të vijojë të jetë pretendente, ndaj kanë ‘anuluar’ planet për t’u larguar dhe mezi presin të punojnë me Ancelottin, një trajner me mentalitet fituesi, dy herë kampion Europe.
