Erion Alibej u arrestua ditën e sotme nga Policia e Elbasanit, si i dyshuari kryesor për porositjen dhe organizimin e vrasjeve të Emiljano Ramazanit dhe Regis Runajt.
Gjithashtu, 34-vjeçari dyshohet të jetë porositësi i ekzekutimit të Bujar Çelës ditën e djeshme në Elbasan.
Erion Alibej është vëllai i Endrit Alibejt (që njihej me nofkat “Tino” dhe “Tarzan”) që ishte shënjestra së bashku me xhaxhanë e tij, Arben Dylgjeri dhe turkun Erdal Durunay që u ekzekutuan në 29 dhjetor të 2018 në Elbasan tek kryqëzimi i Bradasheshit.
34-vjeçari ka qenë i dënuar në Itali me 4.5 vite burg për trafik kokaine. Ai u arrestua në Torino në 2012 së bashku me disa anëtarë të tjerë të bandës, ndërkohë që pasi shleu dënimin u rikthye në vend.
Rreth 2 vite e gjysmë më parë, 34-vjeçari u arrestua për një plagosje dhe deri më tani ndodhej në arrest shtëpie. Ai akuzohet se plagosi Xhon Rustën, i njohur si kushëriri i Suel Çelës. Por fakti se ishte nën akuzë dhe në arrest shtëpie nuk e pengoi që të porosiste tre vrasje.
Si funksiononte grupi në Itali
Sipas policisë italiane të dy vëllezërit drejtonin një grup te trafikut të drogës nga Holanda drejt veriut të Italisë. Sipas dosjes italiane dy vëllezërit të konsideruar si koka e grupit u vendosën në përgjim në gusht të vitit 2011 pasi dyshoheshin për trafikim dhe shpërndarje droge në veri dhe në qendër të Italisë. Po sipas dosjes hetimore dy vëllezërit kishin kontakte të shumta si me furnizuesit e lëndës narkotike ashtu edhe me blerësit.
Përgjimet shkuan deri në Amsterdam ku Endrit Alibej shfaqej duke bërë pazare droge me një bashkatdhetarin shqiptar te identifikuar nga policia italiane me emrin Astrit. Në grupin që u godit në Itali në 2012 ka pasur shqiptarë, afrikanë dhe italianë, kokaina trafikohej nga Holanda në Itali
