Kryeministri hungarez, Viktor Orban premtoi sot se do të mbrojë Poloninë kundër “procesit hetimor” të Brukselit, ndërsa Varshava rrezikon sanksione të BE-së pas reformave gjyqësore mjaft të diskutueshme.
“Në interes të Evropës dhe me frymën e miqësisë së vjetër hungarezo-polake, fushata e tepruar hetimore kundër Polonisë nuk mundet kurrë të përmbushet me sukses”, u shpreh lideri populist, gjatë një vizite në Rumani.
“Hungaria do të përdorë të gjitha mjetet e mundshme ligjore në Bashkimin Evropian për të demonstruar solidaritet me polakët”, theksoi ai gjatë një fjalimi të përvitshëm në Universitetin e verës në Baile Tusnad, një qytet i Transilvanisë me pakicë të konsiderueshme hungareze.
Senati polak, i dominuar nga konservatorët miratoi dje në mbrëmje një reformë mjaft të diskutueshme të Gjykatës së Lartë, pavarësisht paralajmërimeve të BE, thirrjeve të Uashingtonit dhe protestave masive.
