Kryetari i Kuvendit Ilir Meta, me anë të një mesazhi drejtuar kryetarit të Dhomës së Deputetëve në Parlamentin britanik, Z. John BERCOË, shprehu keqardhjen për sulmin terrorist që ndodhi orët e para të së martës në Londër.
“Sulmi në Manchester është një krim barbar i cili nuk është tragjedi vetëm për vendin tuaj por për gjithë botën e qytetëruar. Ju siguroj se Shqipëria dhe shqiptarët qëndrojnë pranë popullit tuaj në këtë çast të vështirë dhe përkrah gjithë botës së civilizuar në luftën kundër terrorizmit ndërkombëtar”, thuhet në mesazhin solidarizues të Metës.
Edhe Partia Demokratike e Shqipërisë e dënoi me forcë sulmin terrorist të Mancesterit, ku gjeten vdekjen 22 njerëz të pafajshëm dhe 59 të tjerë u plagosen.
“Ky akt terrorist i shëmtuar dhe brutal është një tjetër shembull se si barbaria e terrorizmit cenon jetën e qytetarëve të pafajshëm në mbarë boten.Partia Demokratike qëndron sot në krah të popullit të Britanisë së Madhe për të kapërcyer këtë fatkeqësi dhe për të luftuar edhe më ashpër ndaj terrorizmit botëror”, thuhet në mesazhin e PD-së
Ndërsa kreu i LIBRA-s Ben Blushi nëpërmjet një statusi në rrjetin social Facebook, shkruan:
“Ngushëllime për Manchester. Ngushëllime viktimave në Manchester gjatë një koncerti të Ariana Grandes. Sa herë që bota na duket më e sigurt,ndodh diçka që na kujton se nuk kemi patur të drejtë. Është siguria e pasigurisë së përhershme”.
