Forca të shumta policie kanë zhvilluar një aksion të madh në Krujë dhe Fushë-Krujë, vende ku ndodhen edhe shtëpitë e Oltion Veselit e Elton Piklit, dy prej të arrestuarve si pjesë e bandës që grabitën rreth 10 milion euro nga barku i avionit, në aeroportin e Rinasit më 9 Prill.
Janë ushtruar kontrolle në banesën e Oltian Veseli në lagjen ‘Çitoze’ të Krujës dhe në banesën e Elton Piklit në lagjen ‘Abaze’ po në Krujë. Kontrolle janë bërë edhe në biznesin ku Pikli punonte si kasap në qendër të qytetit të Krujës. Por jo vetëm kaq, pasi Forcat Special kanë kontrolluar edhe disa banesa të personave të tjerë të dyshuar si të përfshirë në super grabitjen e Rinasit.
Kujtojmë që Elton Pikli, 32 vjeç nga Kruja është arrestuar teksa tentonte të largohej drejt Bullgarisë. Ai u konsiderua si i 5-ti i grupit, pasi është edhe personi i pestë i kapur për ngjarjen Pikli, sipas policisë nuk figuron i skeduar apo me rekorde kriminale. Pikli ka punuar si kasap në Krujë.
Ndërsa Oltion Veseli, i vënë në pranga, si bashkëpunëtor i supergrabitjes në Rinas, është personi i veshur komando që gjendet në pistën e aeroportit pranë avionit të linjës Tiranë-Vienë në momentin e grabitjes më 9 prill.
