Një 46-vjeçar është ndaluar nga Policia e Durrësit, në kuadër të hetimeve për atentatin me armë zjarri që ndodhi më 3 gusht në autostradën Durrës-Tiranë, ku një 35-vjeçar mbeti i plagosur.
Në njoftimin zyrtar, Drejtoria Vendore e Policisë Durrës bën me dije se është ndaluar shtetasi A. D., banues në fshatin Xhafzotaj, i cili dyshohet se ka drejtuar automjetin nga ku u qëllua me armë zjarri në drejtim të makinës së shtetasit L. Sh.
Ai është i afërm i njërit prej autorëve të dyshuar, Emiliano Domi, tashmë i shpallur në kërkim së bashku me vëllain e tij, Elton Domi.
Sipas policisë, dy vëllezërit dyshohet se pas një konflikti për një parakalim në rrugë, kanë ndjekur makinën e 35-vjeçarit dhe kanë hapur zjarr ndaj tij. Nga të shtënat, L. Sh. mbeti i plagosur, por fatmirësisht ndodhet jashtë rrezikut për jetën.
Policia po punon intensivisht për dokumentimin e plotë të ngjarjes, sqarimin e rrethanave dhe kapjen e dy autorëve të dyshuar.Ngjarja ndodhi rreth orës 01:00 të datës 03.08.2025, në segmentin e autostradës “Durrës-Tiranë”.
Sipas hetimeve paraprake, konfliktit paraprak mes drejtuesve të mjeteve i ka paraprirë një parakalim i debatueshëm, që më pas ka përfunduar në ndjekje dhe të shtëna me armë zjarri ndaj automjetit të 35-vjeçarit. Të dy të dyshuarit, Emiliano dhe Elton Domi, janë banues në fshatin Xhafzotaj të Durrësit dhe aktualisht janë në kërkim.
