Opozita e Bashkuar do të zhvillojë pasditen e sotme një protestë kombëtare.
Në dallim nga herët e tjera, tubimi do të mbahet në orën 18:00, ndërkohë që opozita ka deklaruar se kjo do të jetë një nga protestat më të mëdha kombëtare kundër qeverisë “Rama”.
Simpatizantët e dy partive kryesore kanë nisur përgatitjet, teksa disa prej tyre janë nisur që në mëngjes për në kryeqytet. Policia e Shtetit ka marrë masat për mbarëvajtjen e tubimit me kamera sigurie, dronë, agjentë civilë, mbi 1500 efektivë policie, automjete të hedhjes së ujit, autoblinda për monitoruar gjithçka dhe ndërhyrë në rast se situata tensionohet.
Gjithashtu, janë pastruar edhe kamerat e sigurisë për të pasur një fokusim të qartë, si dhe shtyllat janë lyer me graso, ndërsa u vendos mbrojtësja te dera e jashtme e Kryeministrisë, por edhe rrethimi me gardh metalik.
Kryetarja e LSI, Monika Kryemadhi ka deklaruar se protesta e së shtunës dhe pjesëmarrja masive do të jetë mesazhi që shqiptarët do t’i japin kryeministrit Edi Rama për tu larguar sa më parë. Ndërkaq, dje kreu i PD-së, Lulzim Basha në një apel në rrjetet sociale ka ftuar qytetarët që të jenë në shesh për të ardhmen e fëmijëve të tyre.
