Policia e Tiranës ka liruar protestuesit e zonës së Astirit, pasi dogjën gomat dhe flamurin e Rilindjes. Tre prej protestuesve do të ndiqen në gjendje të lirë. Prej ditësh, banorët e Astirit po protestojnë në lidhje me dëmshpërblimet për banesat dhe bizneset që preken nga projekti i Unazës së Re.
Deputetët e PD-së, Gent Strazimiri dhe Klevis Balliu, si dhe Endrit Brahimllari i LSI-së, shkuan mbrëmë në komisariatin nr 6, për të kërkuar lirimin e tyre. Në një prononcim për mediat, Strazimiri tha se protesta nuk do të ndalet, deri në plotësimin e të drejtave të tyre.
“Protestuan të irrituar për faktin se janë fyer në mënyrën më të turpshme dhe rrugaçërore nga ai që do duhej të ishte i pari kryeqytetas, dhe jo i pari rrugaç, duke i konsideruar shpellarë.
Protesta do të vazhdojë, por sigurisht do vazhdojë edhe presioni nga ana e qeverisë. Ne do të jemi këtu deri sa të drejtat e tyre të respektohen dhe të trajtohen si kryeqytetas pavarësisht nëse kanë lindur në Tiranë apo jo”, tha Gent Strazimiri para komisariatit të policisë në Kombinat.
https://tiranatoday.com/dogjen-goma-dhe-flamurin-e-rilindjes-banoret-e-astirit-perfundojne-ne-polici/
