Policia e Shtetit a shpërndarë për mediet një raport për procesion e votimit që u zhvillua ditën e djeshme. Policia theksoi se ka ndërhyrë me vendim të Komisionit të Qendrës së Votimit, brenda qendrave të votimit në 72 raste, gjatë kohës së votimit, në të gjithë vendin.
Njoftimi i plotë i policisë
Policia e Shtetit raporton se me përfundimin e procesit të votimit në të gjithë vendin, punonjësit e Policisë së Shtetit janë paraqitur pranë çdo qendre votimi dhe më pas kanë bërë shoqërimin e materialeve zgjedhore dhe kutive të votimit nga QV-të për në VNV.
Gjatë shoqërimit nuk pati asnjë problem për sa i përket përmbushjes së detyrës nga punonjësit e Policisë, përveç rastit në qytetin e Vlorës ku është shënuar një incident mes komisionerëve, por me ndërhyrjen e Policisë situata është normalizuar dhe zgjidhur nga KZAZ.
Gjatë kohës së votimit, në të gjithë vendin, Policia e Shtetit ka ndërhyrë me vendim të Komisionit të Qendrës së Votimit, brenda Qendrave së Votimit në 72 raste.
Në vijim, Policia e Shtetit është fokusuar në përmbushjen e detyrave për: Marrjen në ruajtje dhe sigurimin e Vendeve të Numërimit të Votave.
Kryerjen e veprimeve proceduriale për të gjithë ngjarjet / incidentet që mund të ndodhin gjatë procesit të numërimit të votave, duke bashkëpunuar me Prokuroritë e Rretheve Gjyqësore.
Menaxhimin e situatave që mund të krijohen në ambientet jashtë Vendeve të Numërimit të Votave.
Në rivendosjen e rregullit dhe të rendit publik në Vendet e Numërimit të Votave, në rastet e kërkesës së ligjshme të KZAZ-ve Shoqërimin e materialeve zgjedhore nga Vendet e Numërimit të Votave për në Komisionin Qendror të Zgjedhjeve në përfundim të procesit zgjedhor.
