Hapja e sezonit turistik ka nxehur gjakrat, në lidhje me vendosjen e tapave në bregdet. Kjo situatë kaotike përkthehet me largimin në masë të pushuesve, të cilët zotërojnë një mjet lundrues, por nuk janë të pajisur me leje. Sipas vendimit në fjalë, të gjitha mjetet lundruese, përveç anijeve të peshkimit nuk lejohen pavarësisht se janë të pajisura me leje lundrimi, nga drejtoria e përgjithshme e kufirit. Kjo përplasje midis Policisë dhe Bashkisë, e cila është përgjegjëse per tapat që duhen vendosur në det, ka sjellë largimin në masë të pushuesve, të cilën zotërojnë një mjet lundrues tip skaf, apo motor uji.
Situata është paradoksale, pasi në vendet e tjera, procedura për të nxjerrë në det mjete lundruese është shumë e thjeshtë, sepse kjo është një mënyrë e promovimit të turizmit. Ende nuk dihen hapat e ndërmarra nga qeveria, por është evidente përplasja mes policisë kufitare dhe pushuesve, që konform të gjithë ligjeve te shtetit shqiptar, duan të nxjerrin në det mjetet e tyre, për të cilat shpenzojnë mijëra euro, dhe paguajnë taksa vjetore.
