Verifikimi i rastit të gazetarit të sulmuar, vë përballë dy fakteve të ndryshme policinë me vetë qëndrimin nga pala e dëmtuar. Detajet e dhëna nga ana e uniformave blu hedhin poshtë qëndrimin e bërë publik nga ana e vetë gazetarit Julian Shota.
Së fundmi, me anë të një postimi në rrjetin social Facebook, ai tregon se çfarë ka ndodhur, pse kishte zgjedhur që të telefononte shefin e policisë. Teksa nuk mungojnë detajet nga ana e vetë gazetarit të sulmuar, ajo që të bie në sy është deklarata kontradiktore me atë të policisë.
https://tiranatoday.com/kercenimi-i-gazetarit-policia-mesazhi-derguar-shefit-te-policise-ska-lidhje-me-ngjarjen/
Policia nënvizon përmes një deklarate për mediat se nga kontrollet e ushtruara në ambientet në pronësi të shtetasit Llesh Buraku, nuk është konstatuar asnjë armë zjarri, apo send tjetër i kundraligjshëm. Në lidhje me sms-së e publikuar, të dërguar nga shefi i Komisariatit të Policisë Kurbin shtetasit Julian Shota, uniformat blu sqarojnë se nuk ka lidhje me ngjarjen, pasi mesazhi që gazetari pretendon se i ka dërguar shefit të Komisariatit Kurbin ku i shpjegon ngjarjen dhe i kërkon ndihmë, nga verifikimet hetimore ka rezultuar se nuk i është dërguar fare shefit, duke mos e vënë në dijeni se çfarë po ndodhte.
Nga ana tjetër e medaljes qëndron gazetari, ku sqaron se shefin e policisë e njeh prej vitesh. Ai thotë se sikur gazetarët janë të gatshëm në çdo orë duke qëndruar në krye të detyrës, ashtu duhet të jetë edhe çdo punonjës policie, duke iu përgjigjur çdo telefonate.
Gazetari Julian Shota sqaron në këtë formë të gjithë ata që hamendësuan se kjo ishte veçse një trillim. Por edhe pse ngjarja është shumë e rëndë, kërcënuesi i gazetarit, Llesh Buraku, do të hetohet në gjendje të lirë. Ky vendim i institucioneve ka indinjuar gazetarin Julian Shota, i cili pyet prokurorinë se kush përgjigjet në rast se atij apo familjes së tij u ndodh diçka.
