Policia e Shtetit ka deklaruar se do të procedojë penalisht, pjesëmarrësit në protestën e opozitës në qytetin e Lushnjes, ku u bllokuan akset kryesore rrugore.
Blutë kanë bërë me dije se kanë bërë dokumentimin e nevojshëm për procedim penal për 120 pjesëmarrës në protestën e paligjshme, mes të cilëve drejtuesit e protestës.
Në këtë tubim, nga shërbimet hetimore policore, janë identifikuar si drejtues dhe organizatorë deputetët, Arben Ristani, Liljana Elmazi dhe personalitet të spikatur të PD-së, si: Myslim Murrizi, Roland Bejko, Lefter Maliqi, Luan Baçi, Agron Kapllani dhe Moisi Meminaj, ku ndër të tjera janë fotografuar dhe filmuar nga shërbimet përkatëse.
Për shtetasit e sipërpërmendur, pjesëmarrës në tubim, janë kryer të gjitha veprimet e para hetimore – proceduriale, dhe materialet i kalohen Prokurorisë Pranë Gjykatës së Shkallës së Parë Lushnje.
Më herët, Policia e Shtetit deklaroi se protesta e opozitës ishte e paligjshme, pasi nuk pati leje nga strukturat e ruajtjes së rendit.
“U kryen të gjitha veprimet e para hetimore – proceduriale dhe materialet i referohen Prokurorisë Pranë Gjykatës së Shkallës së Parë Lushnje, në ngarkim të shtetasve Arben Ristani, Myslim Murrizi, Liljana Elmazi, Roland Bejko, Lefter Maliqi, Luan Baçi, Agron Kapllani, Moisi Meminaj, dhe personat e sipërpërmendur pjesëmarrës në tubim për veprën penale “Organizimi dhe pjesëmarrja në grumbullime dhe manifestime të paligjshme “, “Pengimi i qarkullimit të mjeteve të transportit “, parashikuar nga nenet 262 dhe 293 të Kodit Penal”, thuhet në njoftimin e policisë.
