Dy shtetas shqiptarë kanë rënë në prangat e policisë, pasi posedonin një sasi të konsiderueshme lënde narkotike. Operacioni antidrogë është kryer mes Policisë së Shtetit, dhe policisë greke. Në sajë të këtij operacioni janë sekuestruar 46 kilogramë e 140 gramë lëndë narkotike Cannabis Sativa.
Në pranga kanë rënë dy shtetas të moshës 23 dhe 25 vjeç, banues në Fier dhe Berat.
“Policia Kufitare Sarandë dhe Seksioni për Hetimin e Narkotikëve në Komisariatin e Policisë Sarandë, në bashkëpunim të ngushtë me Policinë Kufitare Greke dhe Antidrogën, kanë bërë të mundur finalizimin me sukeses të operacionit, ku më datë 22.09.2018, nga ana e Policisë Greke u bë e mundur kapja e dy shtetasve, dhe konkretisht M. B., 23 vjeç, banues në Fier dhe S.M., 25 vjeç, banues në Berat. Si dhe sekuestrimi i dy çantave të shpinës, ku brenda tyre kishte 46 kilogramë e 140 gramë lëndë narkotike Cannabis Sativa.
Operacioni ka nisur 48 orë më parë nga Policia Kufitare e Livadhjasë Sarandë, në bashkëpunim me Seksionin për Hetimin e Narkotikëve në Komisariatin e Policisë Sarandë, ku gjatë patrullimit në kufirin jeshil, Policia Kufitare ka konstatuar shtetasit që po transportonin lëndën narkotike në drejtim të shtetit grek.
Menjëherë është njoftuar Policia Kufitare Greke dhe Antidroga, ku në bashkëpunim e koordinim të plotë mes shërbimeve tona e policisë greke, është mbajtur nën vëzhgim lëvizja e tyre, ku është finalizuar dhe kapjen e tyre në vendin e quajtur “Koritiani Thesproti”, Igumenicë, Greqi.
Po punohet për dokumentimin dhe zbardhjen e plotë të këtij rasti”.
