Gjatë ditës së sotme, Inspektori i Përgjithshëm, Shkëlqim Hajdari ka realizuar një takim konsultativ me komunitetin e biznesit. Në këtë takim është prezantuar platforma e inspektimit online. Inspektimet do të jenë të planifikuara, të njoftuara dhe të informuara që më parë në lidhje me dokumentacionin që do tu kontrollohet bizneseve.
Procesi i inspektimit online do të ulë abuzimin dhe korrupsionin në këtë proces kaq të rëndësishëm të mbarëvajtjes së biznesit.
“Listat dixhitale dhe kartat dixhitale të të gjithë inspektorëve të Republikës së Shqipërisë, sipas inspektorateve shtetërore, pranë biznesit. Kemi dërguar të gjithë check-listat, që do të thotë se çdo inspektorat shtetëror që vjen tani e tutje për të bërë një inspektim, do ta bëjë atë inspektim mbi bazën e disa dokumenteve standarde të formalizuara dhe mbi bazën e check-listave, për të garantuar që çdo biznes të kontrollohet në mënyrë të barabartë”, ka thënë mes të tjerash z.Hajdari.
Kryetarja e Unionit të Dhomave të Tregtisë, Ines Mucostepa, kërkoi në emër të biznesit që inspektorët të jenë më bashkëpunues me sipërmarrjen dhe ka mbështetur programin transparent të inspektimit.
“Është e rëndësishme që apelimi të jetë pikërisht pranë Inspektoratit Qendror, në mënyrë që edhe në rast abuzimi të jetë ky sportel, ku të gjitha sipërmarrjet të mund të depozitojnë ankesat e tyre lidhur me abuzime dhe raste të ndryshme. Ne si sipërmarrje, duke dëgjuar platformën që ju sot informuat, praktikisht do ta mbështesim këtë iniciativë. E konsiderojmë vërtetë shumë të rëndësishme. Transparenca e inspektimit ne e dimë që do të krijojë një klimë të mirë biznesi, do të ndihmojë formalizmin e ekonomisë, konkurrencën e ndershme mes sipërmarrjes dhe do të ndihmojë patjetër në eliminimin e korrupsionit. Por, në të njëjtën kohë, ashtu siç do t’ju mbështesim, patjetër do të jemi edhe shumë të vëmendshëm për të mbikëqyrur gjithë këtë proces”, tha znj.Mucostepa.
Platforma e inspektimit online ka nisur që me fillimin e vitit dhe ka nxjerrë jashtë funksionit “blloqet” gjatë kontrollit të bizneseve.
Sipas Inspektoratit Qendror, tashmë janë 500 pajisje me internet që kryejnë këtë funksion në terren, ndërkohë që pritet të ndërhyhet në ligjin mbi inspektimin për ruajtjen e aktit administrativ, gjë që do rrisë transparencën në këtë fushë.
