Në jo pak raste janë bërë publike në media e rrjete sociale, emrat e profesorëve që kanë probleme me integritetin akademik. Plagjiatura është kthyer në një sëmundje në universitetet shqiptare. Mungesa e dijes, kohës e shumë faktorëve të tjerë, bëjnë që plagjiatura të shihet si i vetmi burim. Është për të ardhur keq, që në vitin 2018, edhe titujt “doktor” të jepen me plagjiaturë.
Mjeku i ri Taulant Muka, i vëmendshëm në kërkimin e tij për të gjetur “gjurmë” të kopjeve nga njerëz që sot gjenden në majë të “piramidës” intelektuale, i ka nxjerrë blof përmes fakteve.
“I njëjti artikull i botuar dhe në anglisht dhe në shqip, mund të konsiderohet si dy artikuj të ndryshëm, dhe mund të të japin titullin doktorant!”. Kështu shkruan ndër të tjera ai, përmes një postimi në rrjetin social Facebook.
Muka kërkon publikisht që çdo universitet privat të hetohet, nëse e ka lënë një gjë të tillë. Më tronditëse bëhet fakti kur ai nënvizon se një ndër universitetet private në vend, ka dhënë me qindra doktoratura vitet e fundit.
Taulant Muka, duke iu referuar këtij rasti, thotë se doktoraturat kanë shumë probleme. Ato janë: plagjiatura, mungesa e strukturës akademike dhe shkencore të të shkruajturit të një artikulli, dhe botimi kryesisht në dy revista që njihen si “grabitqare”.
