Ka mjaftuar një pakënaqësi në punë, që një shqiptar 36-vjeçar të sulmonte shefin e tij në Belgjikë. Sikundër shkruajnë mediat belge, menaxheri i ka kërkuar punëtorit 36-vjeçar shqiptar që të ndryshonte sektor, por ky i fundit nuk ka pranuar. Kaq ka mjaftuar që mes palëve të ndizeshin gjakrat, e shqiptari të merte një thikë për ta kërcënuar.
Rasti në fjalë është shënuar në një kompani frutash në Antwerp. Po të njëjtat burime shtojnë se ndonëse menaxheri ka tentuar që të shmangte sulmin, ka mbetur i plagosur një punëtor tjetër. Ai ka marrë plagë, pasi ka tentuar që ti hiqte thikën shqiptarit.
I plagosuri ndodhet jashtë rrezikut për jetën, por nuk është i aftë për punë për 16 ditë. Ndërkohë, 36-vjeçari shqiptar i cili jeton në Antwerp, do të dalë përpara Gjykatës, ku do të përballet me akuzat.
