Prej kohësh është vënë re një ftohje marrëdhëniesh mes kryeministrit Rama dhe kryebashkiakut Erion Veliaj. Rama ka zgjedhur pikërisht konferencën e fundvitit me gazetarët për të “sulmuar” kryebashkiakun Veliajn, të cilin e akuzon se po bën një komplot ndaj Partisë Socialiste.
“Ky grup armiqësor nuk e ka të gjatë”, tha ndër të tjera Rama, teksa e cilësoi Veliajn si koka e këtij grupi armiqësor brenda PS-së.
Nuk dihet nëse kjo deklaratë e Ramës ka qenë një ‘mesazh’ drejt Kryebashkiakut, apo thjesht një ironi e radhës nga ana e kryeministrit, edhe pse siç duket në video ai ishte mjaft i sinqertë kur deklaroi se ka një komplot brenda Partisë Socialiste. Gjë që u vijua me deklaratën se po mendohet për dënime të rënda apo internime, si për të kujtuar periudhën e sistemit komunist kur brenda partisë gjendeshin armiq apo spiunë.
Fjala e Ramës:
Përsa i përket konspiracionit. Ka një komplot në PS. Jam i shqetësuar për këtë. Është një lëvizje konspirative. Jemi duke menduar për një gjyq popullor dhe dënime shumë të rënda. Është e qartë për mua që koka e këtij komploti është kryetari i Bashkisë së Tiranës, padiskutim i mbështetur fuqimisht nga ish-ministri i Brendshëm Xhafaj. Dyshohet për përfshirjen e institucioneve të tjera në këtë konsipracion.
Ky grup armiqësor nuk e ka të gjatë. Erion Veliaj mund të vazhdojë të dalë kundër partisë me planet e tij e të vazhdojë të mbjellë pemë, por një ditë një nga ato pemë do të varet si shembull që në këtë parti nuk ka komplote./ TIRANA TODAY
