Vitin e kaluar, vetëm një muaj pas sulmit në Manchester Arena, një 17-vjeçar i identifikuar si Lloyd Gunton u kap nga autoritetet, pasi iu zbulua plani për një sulm terrorist në koncertin e Justin Bieber, në Wales.
Tashmë, duket se gjykata ka dhënë vendimin e saj, duke e dënuar të riun me burgim të përjetshëm dhe se nuk do të ketë të drejtën për lirim me kusht për 11 vjet. Të riut iu gjet një çekiç me thumba, një thikë dhe një letër ‘martirizimi’, duke e deklaruar atë një “ushtar të ISIS”.
Në letër thuhej: “Kam sulmuar Cardiffin sot sepse qeveria juaj vazhdon të bombardojë në Siri dhe Irak. Do të ketë më shumë sulme në të ardhmen”. Atij iu gjet gjithashtu një shënim me udhëzime për të sulmuar jobesimtarët me një makinë.
Mbrojtja e Gunton argumentoi se djali, i cili vuan nga një çrregullim i spektrit të autizmit, nuk kishte ndërmend të kryente sulm. Vetë i riu tha se “donte të shihte se sa e thjeshtë ishte për njerëzit që kishin interes në terrorizmin të hynin online e të merrnin informacione, sepse policia dhe qeveria po përpiqen të luftojnë terrorizmin dhe radikalizmin”.
Ndërkohë gjykatësi nuk e besoi të riun, të cilit iu drejtua: “Jam i sigurt se nuk keni planifikuar vetëm vrasjen e një personi, por vrasje masive. Në gjykimin tim, duhet të kaloj një dënim të pacaktuar. Veprimet tuaja tregojnë një shpërfillje të plotë për jetën njerëzore.”
Gunton u dënua për dy akuza për nxitje të terrorizmit, një akuzë për përgatitjen e një akti terrorist dhe dy akuza për mbajtjen e informacionit terrorist. TIRANA TODAY
