Pasi kishte kaluar më shumë se dy vite në arrati, duke i shpëtuar si “Magjistar” 13 operacioneve policore për kapjen e tij, Klement Balili zgjodhi të vetëdorëzohej. Pas përshëndetjes me familjarët e tij, “Eskobari i Ballkanit” u largua nga banesa me një automjet që drejtohej nga i nipi, kryebashkiaku i Delvinës, Rigels Balili, për të hipur në “Range Roverin”, e drejtorit të Përgjithshëm të Policisë së Shtetit, Ardi Veliu, në një zonë ta pabanuar në dalje të Delvinës.
Pas vetëdorëzimit, një reagim të menjëhershëm pati nga klasa politike. Duke e parë në dy anët e medaljes, sa i takon vetëdorëzimit të Balilit, lë shteg për interpretim për sukses dhe dështim, ndërsa mbetet ende enigmë për “garancitë” që ka marrë para se të vetëdorëzohej.
Për dy vite me radhë, emri i Balilit u lakua ndjeshëm. Pas nuk u la edhe nga ish-ambasadori i SHBA-së në vendin tonë, Donald Lu. Pas mbërritjes së materialeve hetimore nga Greqia kundër Balilit, ai vendosi të dorëzohej, por me dy kushte.
“Balili kishte dy kushte për vetëdorëzimin. Së pari, që mos të keqtrajtohej, dhe që të deklarohej vetëdorëzimi. Jam kontaktuar nga familjarët pas 3 muajsh negociata. Shkova personalisht me një makinë shoqëruese”, tha Drejtori i Policisë së Shtetit, Ardi Veliu.
Nga kjo tablo e qartë, nuk mund të cilësohet si sukses i plotë i policisë, pasi Balili nuk u arrestua në kushtet e flagrancës, por u vetëdorëzua. Njeriu që trazoi politikën dhe u konsiderua me emër të përveçëm si “peshk i madh” në rangjet e botës së trafikut të narkotikëve, tashmë pret përballjen me gjykatën.
