Ndërhyrja e ish-punonjësit të policisë, Ymer Xhafa, bëri që përplasja me armë zjarri në Kavajë ndodhur ditën e sotme, mos të kishte një fund tragjik. Xhafa ishte ai që ndërhyri i pari dhe i hoqi kallashnikovin nga dora, 31 vjeçarit Fitim Baboçi.
Ky i fundit plagosi bashkëqytetarin e tij 53-vjeçar, Rexhep Taren, ndërsa vijonte e mbante armën në dorë në një orar kur zona ishte mjaft e populluar.
Xhafa tregoi për “News24”, momentin kur ai së bashku me shokun e tij, po ashtu ish-polic, arritën që të shmangnin një tragjedi, duke ia hequr nga dora armën agresorit.
“Dëgjova krisma armësh, pashë një person, që nuk e njihja, me armë dhe një grumbull njerëzish. Nuk mund të rrija indiferent, ai më ktheu shpinën. I dola nga mbrapa, i neutralizova armën dhe e mbajta, bashkë me shokun tim, edhe ai ish-oficer. Mund të ndodhte katastrofë, autori nuk reagoi. Jemi njerëz mbi të gjitha, ne jemi për të mirën. Ishte rastësia. Nuk pata frikë. Nuk reagoi edhe u neutralizua. I dhamë ujë dhe pastaj erdhi policia”, deklaroi Ymer Xhafa.
