Mbrëmjen e sotme ka ndodhur një plagosje me armë zjarri. I plagosur ka mbetur 45-vjeçari i identifikuar Erion Çollaku në qytetin e Bilishtit.
Çollaku është qëlluar me një plumb në bark nga shtetasi me inicialet A.O dhe ndodhet në gjendje të rëndë në Spitalin e Korçës.
Ngjarja e rendë thuhet se ka ndodhur për motive banale.
Sipas Policisë, autori dhe i plagosuri fillimisht janë konfliktuar verbalisht dhe më pas sherri ka degraduar në përdorimin e armës së zjarrit.
Të dy personat e përfshirë në konflikt, dyshohet se kanë qenë në gjendje të dehur.
Ngjarja thuhet se ka ndodhur në një lokal në qendër të qytetit. Autori është shpallur në kërkim.
Informacion paraprak.
Më datë 03.05.2018, rreth orës 19:30, jemi njoftuar se në një lokal në Bilisht, shtetasi A.O, rreth 50 vjeç, pas një konflikti për motive të dobëta, ka plagosur me armë zjarri shtetasin E.C. rreth 45 vjeç, të dy banues në Bilisht.
Ky i fundit aktualisht po merr mjekim në Spitalin e Korçës, ku ndodhet në gjendje të rëndë shëndetësore.
Forcat e Policisë janë vënë në ndjekje të autorit dhe po punojnë për zbardhjen e rrethanave të ngjarjes dhe kapjen e tij.
