Dy vjet pas deklaratës së ish-ambasadorit amerikan, Donald Lu, autoritetet kanë arrestuar Klement Balilin, i quajtur si “Eskobari i Ballkanit”. Ambasadori amerikan trumbetoi me të madhe për arrestimin e Balilit.
Në vitin 2018, Donald Lu, në konferencën “Forca e ligjit në Veprim” të organizuar nga Policia e Shtetit lëshoi disa mesazhe të forta, duke thënë se po vjen koha që kokat e krimit do të futen në burg. Lu e quajti dështim të qeverisë dhe policisë mos arrestimin e Klement Balilit.
Deklarata e bërë në 5 korrik 2018
“Shumë ka ndodhur në 8 muaj, e shumë ka mbetur për tu bërë. Shqipëria mbështeti arrestimin e trafikantit të madh Met Kanani në Turqi, më pas banda e tij u arrestua në Shqipëri.
Policia mbështeti sekuestrimin e 613 kg kokainë dhe arrestimin e Arbër Çekaj në Gjermani. Disa anëtarë të bandës së tij janë arrestuar dhe do arrestohen të tjerë. Hetimi penal kundër ish-ministrit të Brendshëm, Saimir Tahiri dhe ish-kryeprokurorit Adriatik Llalla vazhdon. Shumë aktivitet për një periudhë të shkurtër kohe por duam rezultate konkrete.
Duam që peshqit e mëdhenj të ndiqen penalisht, të dënohen dhe futen në burg. Ky do ishte sukses. Dua të theksoj një dështim të qeverisë dhe policisë, arrestimin e Klement Balilit. I bëjmë thirrje që të vazhdojnë luftën kundër krimit të organizuar pa mëshirë.
Kjo do të sjellë krijimin e shpejt të KLP, SPK-ut dhe BKH. Ne kemi konfirmuar burimet. Kokat e krimit duhet të kenë frikë dhe drejtësia për ta po vjen”, përfundoi Lu.
