Është përmbyllur konkursi për marrjen e gradës “Drejtues i Parë” i hapur me urdhrin e kreut të Komanduar të Policisë së Shtetit, Rebani Jaupi nga ku kanë dalë edhe emrat e pesë policëve fituesve.
Kandidatët Ardi Veliu, Artan Shkëmbi, Bledar Çeliku, Gentian Shehaj dhe Kastriot Skënderaj kanë arritur të kalojnë konkursin dhe të marrin gradën “Drejtues i parë”.
Ditën e sotme nga 33 kandidatë që aplikuan për gradën “Drejtues i Parë”, vetëm 28 u paraqitën për konkursin, nga ku vetëm 6 prej tyre fituan testin me shkrim. Nga pesë kandidatët më shumë pikë ka marrë Ardi Veliu, kreu i Policisë së Tiranës. Nga këta 5 emra do të dalë edhe Drejtori i Përgjithshëm i Policisë së Shtetit, ku një nga emrat më të përfolur është ai i Ardi Veliut.
Ish-Drejtori i Përgjithshëm i Policisë së Shtetit Haki Çako i lirua nga detyra më 8 Janar. Me propozim të Ministrit të Brendshëm, zotit Fatmir Xhafaj, Këshilli i Ministrave miratoi lirimin nga detyra të Drejtorit të Përgjithshëm të Policisë së Shtetit, Drejtues Madhor Haki Çako.
Në vend të Çakos, në postin e drejtorit është komanduar Rebani Jaupi, që pas lirimit të Çakos kandidati kryesor për kryepolic është konsideruar Ardi Veliu.
Jaupi mbante postin e zv/drejtorit të Policisë së Shtetit, ndërsa gjatë emërimit të tij Haki Çako e pati vlerësuar Jaupin, si një ndër ekspertët më të mirë të policisë në fushën e krimeve ekonomike e financiare, me një karrierë të pastër e profesionale në Policinë e Shtetit.
