Shkencëtarja e Organizatës Botërore të Shëndetësisë (OBSH) Soumya Swaminathan, ka këshilluar qytetarët në të gjithë botën që të mos i përziejnë vaksinat kundër Covid-19 nga prodhues të ndryshëm, duke theksuar se një vendim të tillë mund ta marrin vetëm zyrtarët e shëndetësisë.
“Është një trend paksa i rrezikshëm. Do të jetë një situatë kaotike në vende, nëse qytetarët fillojnë të vendosin se kur dhe kush do të marrë dozën e dytë, tretën dhe të katërtën”, tha ajo.
Swaminathan e ka cilësuar përzierjen e vaksinave si një zonë “pa të dhëna”, por më pas ka shpjeguar këtë deklaratë të saj, shkruan The Indian Express.
“Individët nuk duhet të vendosin vetë, kjo u takon agjencive të shëndetit publik bazuar në të dhënat e disponueshme. Imunizimi dhe siguria duhet të vlerësohen”, u shpreh shkencëtarja.
“Grupi Strategjik Këshillimor i OBSH-së për vaksinat, tha në qershor se vaksina Pfizer mund të përdoret si dozë e dytë pas një dozë fillestare të AstraZeneca, nëse kjo e fundit nuk është e disponueshme.
Një provë klinike e udhëhequr nga Universiteti i Oksfordit në Britaninë e madhe është duke vazhduar studimin për përzierjen e vaksinave AstraZeneca dhe Pfizer.
