Dy vjet burg dhe një gjobë si dënim ndaj një gruaje në Arabinë Saudite, vetëm sepse përqafoi një këngëtar. Ndoshta mund t’ju duket e çuditshme, por për rregullat e atij vendi, kjo është një shkelje.
Mediat e huaja raportojnë se një grua e paidentifikuar në Arabinë Saudite është dënuar me 2 vite heqje lirie, pasi kishte përqafuar një këngëtar, teksa po performonte në skenë.
Sipas ligjit religjioz të Arabisë Saudite, femrat janë të ndaluara që të prekin apo të ndodhen pranë meshkujve me të cilët nuk kanë lidhje martesore, ose familjare.
Ngjarja ndodhi në qytetin e quajtur Taif, ku këngëtari irakien, Majid al-Muhandis, po mbante koncertin tij të rradhës. Ajo është ngjitur në skenë dhe i ka dhënë një përqafim dashamirës këngëtarit, duke i shprehur admirimin për artin e tij.
Për fat të keq, ngjarja është cilësuar si incident dhe thyerje e ligjit nga autoritetet vendase. Krahas dënimit me heqje lirie, gruaja që shkeli ligjet është e detyruar të paguajë dhe një gjobë prej $27,000.
