Në Universitetin e Tiranës pas zëvendësimit të 3 anëtarëve në bordin administrativ kanë nisur përplasjet e para, dhe madje jo vetëm brenda rektoratit por edhe nga fakultetet të cilat kundërshtojnë rektorin Mynyr Koni dhe urdhrin e ministres së arsimit.
Sipas drejtuesit të këtij institucioni zëvendësimi edhe pse i pa argumentuar nga ministrja është legjitim, ndërkohë që kjo kundërshtohet nga ish drejtuesi i këtij institucioni, sot dekan tek Fakulteti Ekonomik.
“Anëtarët e nominuar nga MAS janë legjitimë në përputhje me ligjin, çdo deklarim tjetër është dezinformim, nuk i merret mendim bordit mendim, në shkresën e minsitres nuk ka argumentim për zëvendësimin” deklaroi Koni.
“Akt i paligjshëm për ndërhyrjen në bord, akti është i qartë, nul pasi bordi është i konstituar” deklaroi Dhori Kule.
Kundërshti mes tyre ka pasur edhe në lidhje me kancelarin e Universitetit. Rektori Koni flet për një vonesë në miratimin e kritereve për administratorin e ri të këtij Universiteti gjë e cila ka sjellë edhe përplasje me kancelarin Robert Skënderi i cili sipas rektorit ka bllokuar punën administrative. Por Dhori Kule veprimet e Konit i cilëson abuzive dhe shkelje të rënda.
“Me 3 gusht pezullova kancelarin e universitetit për mosrealizmin e detyrave dhe bllokimin institucional”-Mynyr Koni
“Ka nxjerrë një urdhër abuziv rektori që të mos pranohen shkresat e kancelarit, i kemi sugjeruar të kthehet tek sjellja e ligjshme. Duke vepruar me ligjin e vjetër ka bërë shkelje të rënda duke firmosur tendera”- Dhori Kule
Debat brenda Universitetit ka pasur edhe disa ditë para shpalljes se kandidateve fitues në universitete. Por sipas dekanit Dhori Kule nuk përjashtohen problemet qe mund të ndodhin edhe këtë vit me pranimet. Kjo për shkak të mosmiratimit të rregullores nga senati i Universitetit dhe për këtë bën përgjegjës rektorin Koni dhe anëtarë të senatit. Por ky debat për rektorin nuk do të ndikojë në procesin e pranimeve.
Ndërkohë që në Bordin e Universitetit të mjekësisë janë dorëhequr dy prej 3 anëtareve të emëruar së fundmi nga ministrja teknike përkatësisht, Daniela Nika dhe Hari Mulla. Dorëheqja është dhënë me arsyetimin se nuk mund të bashkëpunonin me pjesën tjetër të bordit për mbarëvajtjen administrative të Universitetit të Mjekësisë.
