Vrasja e Konstantinos Kaçifës ka shkaktuar përplasje diplomatike mes Shqipërisë dhe Greqisë.
Nga reagimi i Ministrisë se Jashtme greke, bie ne sy fakti qe vendi fqinj e konsideroi të papranueshme humbjen e jetëve njerëzore në çdo rrethanë.
“Sidoqoftë është e papranueshme që çështja arriti deri në pikën e humbjes së jetës njerëzore. Presim nga autoritetet shqiptare që të zbardhë plotësisht rrethanat në të cilat humbi jetën një qytetar grek dhe të gjitha veprimet t’i ndërmarrë menjëherë.”
Pikërisht për këtë qëndrim, reagoi menjëherë Ministria për Evropën dhe Punët e Jashtme të Shqipërisë. Ministria shprehu zhgënjimin për mënyrën se si Athina zyrtare e trajtoi çështjen.
“Ministria për Evropën dhe Punët e Jashtme shpreh zhgënjim për reagimin e Ministrisë së Punëve të Jashtme të Greqisë, e cila jo vetëm nuk dënon sulmin me armë ndaj forcave tona të rendit, po flet për “humbje jete të papranueshme”.”
Tirana zyrtare bën thirrje që ngjarjes të mos i jepen ngjyrime politike dhe se Shqipëria është një vend i siguritë edhe për shtetasit me kombësi greke. Përmes Twitterit kryeministri Edi Rama, ishte me i drejtpërdrejtë në mesazhin e tij.
“Fqinj të dashur! Në vend ta quani të papranueshme humbjen e jetës së një të fandaksuri që qëlloi me plumba luftarakë mbi policinë tonë, e cila bëri vetëm detyrën e saj, bashkohuni me ne në falenderimin e Zotit që asnjë jetë e pafajshme nuk humbi sot nga marrëzia ekstremiste.”
