Biznesmeni Petrit Çela ka reaguar lidhur me ngjarjen e së hënës, ku disa persona u përplasën me policinë në Elbasan.
U tha se automjeti Audi i blinduar ishte në pronësi të tij dhe se biznesmeni është shpallur në kërkim nga policia, ndërsa vetë Çela ka sqaruar se si qëndron e vërteta.
Në një prononcim për Neës24, Çela thotë se nuk është në kërkim por se është shoqëruar në polici për të dhënë shpjegime, madje shton se natën e ngjarjes ka qenë në shtëpi me familje.
“Është lajm i rremë. Nuk isha i shpallur në kërkim, shkova në polici. Jam shoqëruar në polici për të dhënë shpjegime. Natën e incidentit, tregu ishte i mbyllur. Roja i tregut nuk e hapi derën, më telefonoi mua. Kur ndodhi ngjarja unë isha pranë familjes sime. Shkova hapa derën e tregut, policia u soll korrekt”, ka deklaruar Çela.
Më tej, biznesmeni thotë se roja i tregut nuk e ka hapur derën pasi policia nuk ka pasur vendim gjykatë për kontroll. Për sa i përket makinës së tij “Audi”, biznesmeni Çela thotë se nuk e përdor askush tjetër, lidhur me aludimet se natën e ngjarjes mund ta kishte marrë i biri drejtimin e makinës.
“Në polici sqarova se përse roja nuk e hapi derën. Nuk kishin vendim gjykate për kontroll në treg. Policia kontrolloi edhe banesën time. Automjeti im u mor në parkingun e tregut. Makina ime e blinduar konform rregullave, në parking. Unë nuk isha në drejtimin e automjetit tip Audi. Mjetin tim Audi nuk e përdor askush tjetër. Policia sekuestroi Audin dhe 5-6 mjete të tjera”, tha Çela.
Po kështu biznesmeni ka mohuar të ketë dijeni se kush e goditi makinën e policisë.
