Policia ka shpallur në kërkim dy persona për kultivim të lëndëve narkotike ndërsa është proceduar në gjendje të lirë kryeplaku i fshatit Limar të Këlcyrës.
Në operacionin e saj, policia ka sekuestruar 107 kg lëndë narkotike, e dyshuar si Cannabis Sattiva. Policia ka shpallur në kërkim dy persona, për të cilët nuk jep detaje të mëtejshme për shkak të hetimeve që po kryhen. Ndërsa kryeplaku i fshatit po procedohet në gjendje të lirë për shpërdorim detyre dhe moskallëzim të krimit.
Njoftimi i policisë:
Gjatë kontrollit të territorit, si dhe mbi bazë të informacioneve të marra në rrugë policore, shërbimet e Komisariatit të Policisë së Përmetit në bashkëpunim me specialistët e seksionit të Hetimit të Narkotikëve në D.V.P. Gjirokastër zhvilluan operacionin antidrogë “LIMARI”. Si rezultat i operacionit, në vendin e quajtur “Ferra e Kuqe”, në një ambient të hapur, në afërsi të fshatit Limar, Këlcyrë, nga shërbimet e policisë u gjetën disa thasë, brenda të cilëve kishte lëndë të dyshuar narkotike Cannabis Sattiva. Pesha totale e lëndës ishte 107 kg, e cila u sekuestrua në cilësinë e provës materiale. Në përfundim të veprimeve të para hetimore filloi procedimi penal në gjendje të lirë për shtetasin: P.K, 35 vjeç, (kryeplak i fshatit Limar), për veprat penale “Shpërdorim i detyrës” dhe “Moskallëzim i krimit”. Gjithashtu janë shpallur në kërkim dy persona, për arsye hetime s’jepen të dhëna. Po punohet për dokumentimin e plotë të kësaj ngjarje. Materialet i kaluan Prokurorisë së Rrethit Gjyqësor Përmet për veprime të mëtejshme.
