Chelsea dhe Liverpool janë ndarë në barazim 1-1 në kryendeshjen e javës së Premier League, e cila u luajt në “Stamfort Bridge”. Eden Hazard shënoi në minutën e 25-të dhe i dha avantazhin Chelseat, por blutë e Londrës nuk arritën të mbyllin takimin dhe i dhanë mundësi Liverpoolit të reagojë në pjesën e dytë, në kërkim të golit të barazimit.
Liverpool hidhet i gjithi në sulm në pjesën e dytë, por Salah dhe Shaqiri gabojnë në disa raste të pastra për shënim. Ndërsa në minutën e 89’ barazohet gjithçka, ishte i sapofuturi në fushë, Daniel Sturridge që shënoi një gol spektakolar dhe ruajti pathyeshmërinë e Liverpoolit për këtë sezon futbollistik. Sulmuesi nuk feston pavarësisht se goli ishte një “perlë” në shenjë respekti për ish skuadrën e tij.
Minutat e mbetura nuk prodhuan ndryshim rezultati, ndërsa tashmë Liverpool ndan kreun e renditjes me Manchester Cityn, me nga 19 pikë, të ndjekura pikërisht nga Chelsea me dy pikë më pak, 17 dhe Tottenham e Arsenal me nga 15 pikë.
