Avokati Spartak Ngjela ka komentuar skandalin e publikuar dje nga VOA, ku akuzohen deputetë të Partisë Socialiste për përgjime lidhur me blerje votash.
Në një status në Facebook, Ngjela shkruan se Zëri i Amerikës goditi në mënyrë frontale Ramën, për të cilin thotë se është ngritur kundër sistemit.
Më tej, teksa argumenton përse Rama nuk duhet të qeverisë më pasi po i bën një dëm të madh vendit, avokati sulmon kryeministrin dhe ish-kryeministrin Berisha teksa shkruan se ata duan të destabilizojnë Shqipërinë.
Postimi i plotë:
Zëri i Amerikës, për blerje votash në zgjedhjet e vitit 2017; goditi në mënyrë frontale kryeministrin aktual të Shqipërisë.
Në fakt, kjo është akuzë e rëndë që po ngre politika amerikane, se Rama është ngritur kundër sistemit.
Njëlloj si Berisha në vitin 1996.
Si mund të drejtojë vendin një njeri i tillë?
Por pyetja më e drejtpërdrejtë duhet të jetë kjo: përse i duhet pushteti një personi si Rama që nuk di të bëjë asgjë, veç korrupsionit?
Si mund të qeverisë një individ si ky kur abuzon mbi pasurinë kombëtare dhe vjedh dhe vota? I tëri është antikombëtar dhe antisistem.
Kjo është një gjendje e rëndë për të ardhmen e Shqipërisë. Janë dy abuzues të mëdhenj të cilët, të akuzuar dhe në pritje të penalizimit të tyre, po duan të destabilizojnë Shqipërinë: Sali Berisha dhe Edi Rama.
Por a do ta arrijnë dot? Jo. Që të dy kanë shpresë për trazira në datën 16 shkurt. Por Zëri i Amerikës e filloi shpalosjen e hapjes së kutisë së zezë të Edi Ramës. Dhe sigurisht që do të vijojë edhe me Bashën e Berishën.
Kështu duhet të vazhdojë.
Pse e filluan me Ramën?
Sepse ai është kryetari i mazhorancës, është kryeministër dhe kohët e fundit ka emëruar në policinë e shtetit ish drejtorët e inkriminuar të Sali Berishës.
Kot e kanë.
Procesi antikorrupsion sot filloi të ecë në një fazë të re. Dhe, nëse vijon kështu, çfarë duhet të kuptohet politikisht?
Politika amerikanë kërkon të deligjitimojë zgjedhjet e vitit 2017, dhe ta çojë reformën përpara me një qeveri tekniko-profesionale të emëruar dhe të drejtuar prej saj. Kjo do të jetë rruga më e sigurt për varrosjen e korrupsionit kryeministror shqiptar të të dy krahëve të politikës aktuale.
