Mediat italiane kanë zbuluar detaje të reja në lidhje me arrestimin e Moisi Habilajt.
Arrestimi këtij të fundit shkaktoi një “tërmet” politik, teksa paraditen e sotme kreu i PD-së kërkoi arrestimin e ish-ministrit Tahiri, duke e cilësuar si kapitenin e trafikut të drogës.
Në nëntor të vitit 2013, policia italiane monitoroi një takim mes Antonio Rielës (i arrestuar dje si pjesë e organizatës kriminale) dhe Florian Habilajt, vëllai i Moisi Habilajt.
Nga përgjimet e hetuesve italianë rezulton se takimi mes tyre u zhvillua për të organizuar sa më shpejt një tjetër trafik droge, pasi në tetor policia i kishte konfiskuar 1.6 ton kanabis në Castelluccio Bay.
Muaj më vonë, Moisi Habilaj është vënë sërish nën përgjim ambiental dhe është dëgjuar të bisedojë me një pronar të një pike karburanti në Siçili.
“Nëse vjen në Shqipëri, ti e kupton se policia shqiptare është e korruptuar dhe ndonjëherë edhe shefi i policisë ndihmon në ngarkimin e çantave”, i ka thënë Habilaj bashkëbiseduesit siçilian.
Në një tjetër përgjim, policia zbuloi një emër konkret, që përket me atë të ish-ministrit Tahiri dhe që u përmend nga Habilaj:
“30 mijë duhet t’ia jap Saimirit”, kështu ka thënë Habilaj duke iu referuar shumës së parave 30 mijë Euro për një rast trafiku droge.
Sipas medieve italiane, rezulton se Moisi Habilaj ka shkuar disa herë në Itali për t’u kujdesur për trafikun e drogës, pas disa rasteve të goditura nga Guarda di Finanza.
Në një rast, ai shkoi në Siçili me një bashkëpunëtor të quajtur Sabi Çelaj, të cilët udhëtuan me një makinë Audi, i njëjti automjet që Partia Demokratike akuzonte se i përkiste Saimir Tahirit dhe përdorej për drogë nga kushërinjtë e tij.
“Ari jeshil i Ballkanit ishte vënë në dispozicion dhe të mafiozit të njohur Sebastian Sardo, sot bashkëpunëtor i drejtësisë italiane dhe dikur administrator i drogës për klanin mafioz kataneze Capello. Në një nga përgjimet e policisë italiane lexohet se grupi i shqiptarëve të jetë shprehur “se nëse nisim një ngarkesë për Sardon, mund të sjellim dhe kallashnikovë, le të vriten me njëri-tjetrin, ne nuk na intereson, ata i duan për vete armët”, raportojnë mediat italiane.
Dje autoritetet italiane arrestuan 7 persona, 3 shqiptarë dhe 4 italiane, teksa u identifikuan 11 anëtarë të organizatës kriminale, nga të cilët u arrestuan 3 shqiptarë dhe 4 italianë.
Të arrestuarit janë Moisi Habilaj 39 vjeç, Maridian Sulaj 29 vjeç dhe Fatmir Minaj 55 vjeç, ndërsa italianët Antonio Riela 46 vjeç, Vincenzo Spampinato 44 vjeç, Gianluca Passavanti 37 vjeç dhe Angelo Busacca 37 vjeç.
Gjatë operacionit u sekuestruan edhe 20 mijë euro cash, ndërsa rezulton se kjo organizatë ka transportuar mbi 3.5 ton marijuanë nga bregdeti shqiptar në Itali në intervale të ndryshme.
