Skandali i vëllait të ministrit të Brendshëm, Fatmir Xhafaj pas akuzave të ndërsjella politike dhe dëshmive të Albert Veliut, dhe gazetarit Jetmir Olldashi, tashmë ka kaluar në organet e drejtësisë.
Prokuroria thirri ditën e sotme, tre zyrtarët e Partisë Demokratike, ish-ministrin e Drejtësisë Gazmend Bardhi, deputetët Ervin Salianji dhe Enkeled Alibeaj.
Megjithatë, Gazmend Bardhi dhe Ervin Salianji dhanë dëshmitë e tyre në prokurorinë e Krimeve të Rënda. Ndërsa pas përfundimit të marrjes së tyre në pyetje nga prokurorët përkatës, të dy zyrtarët e selisë blu dhanë prononcimet e tyre. Sipas Salianjit, PD zotëron përgjime të reja, ku dëgjohet vëllai i ministrit të Brendshëm, Agron Xhafaj i cili i drejtohet Albert Veliu, që thoshte; “me 10 kg mos më hajde, unë flas për 100 e sipër”.
“Gjithçka dimë nga rrethanat dhe faktet është se Agron Xhafaj është i përfshirë në aktivitet të paligjshëm kriminal, dhe është një nga bosët e drogës në Shqipëri. Është e qartë si drita e diellit që qeveria është e përfshirë në mbrojtjen e krimit dhe jo të qeverisë. Gjithçka që kishin pyetje, ka të bëjë për hetimin. Por nuk mund të flas për këtë, pasi është pjesë e sekretit hetimor. Ka një deklarim nga gazetari Jetmir Olldashi, i cili më ka sjellë një pjesë të audio-përgjimit, ku Agron Xhafaj bënte pazare droge. Nuk janë akuza politike. Aty dëgjohet zëri i Olldashit, dëshmitarit Albert Veliu, dhe vëllai i Xhafajt, Agron Xhafaj që thoshte; ‘Me 10 kg mos më hajde, unë flas për 100 e sipër’. Kam pjesë të tjera të audio-përgjimit ku implikohet Agron Xhafaj”,- ka deklaruar deputeti i PD-së për gazetarët”, u shpreh Salianji.
Një fakt të tillë e ripërsëriti edhe vetë deputeti tjetër demokrat, Flamur Noka në Komisionin e Ligjeve. Sipas Nokës, së shpejti PD do publikojë përgjim të ri për vëllanë e ministrit Xhafaj.
“Nuk është rastësi që Agron Xhafaj iku në Itali, pasi ishte lëvizje për t’i shpëtuar drejtësisë në Shqipëri. Agron Xhafajn duhej ta përfshinte ligji Anti-mafia. Kjo qeveri përfaqëson votat e trafikantëve. Materiali i dytë që do dalë do jetë vërtetim i faktit se Agron Xhafaj ishte aktiv në trafikun e drogës, kur vëllai i tij ishte ministër. Nëse të shtunën nuk largojmë ministrin e Brendshëm, bëhuni gati se do ju largojmë me gjithë kryeministrin”, ka thënë Noka
