Ish-Ministrja e Integrimit Klajda Gjosha ka reaguar sa i përket përgjimeve të nxjerra nga gazeta gjermane Bild, duke theksuar se ato kanë dhënë një leksion shumë të vlefshëm.
Nëpërmjet një postimi në Facebook, Gjosha shprehet “se politika ka nevojë të përfaqësohet nga njerëz të thjeshtë, normal dhe si të gjithë qytetarët e këtij vendi”.
Më tej, ajo vijon duke thënë se politika nuk duhet të merret si diçka konfliktuale dhe personale, dhe se ajo duhet të mësojë të respektojë e të ndahet një herë e mirë nga përçarja.
Ajo e përmbyll postimin e saj duke thënë se Shqipëria e ka vendin drejt Evropës dhe se për ta bërë këtë realitet “do të mjaftonte vetëm pak maturi politike”.
Postimi i plotë:
Përgjimet e BILD na kanë dhënë një leksion shumë të vlefshëm, atë që politika ka nevojë të përfaqësohet nga njerëz të thjeshtë, normal dhe si të gjithë qytetarët e këtij vendi.
Kuvendi i Shqipërisë, duhet të jetë shtëpia e integritetit shoqëror, vlerave, kulturës dhe dijes. Sot më shumë se kurrë nuk mund të pranojmë që Komisioni i Ligjeve, që propozon dhe miraton ligjet që diktojnë jetën e qytetarëve shqiptarë, të drejtohet nga njerëz që shesin dhe blejnë të drejtën e qytetarëve për të votuar të lirë, të shesin dhe të blejnë postet e administratës publike, të propozojnë ligje që dënojnë qytetarët dhe të shantazhojnë këdo që i tregon ligjin kur ata janë vetë objekt i tij!
Politika duhet cliruar nga retorika konfliktuale, personale dhe e urrejtjes. Qytetarët e këtij vendi nuk mund të ndahen në të majtë dhe të djathtë, ata janë të gjithë të barabartë brenda ombrellës që quhet Shqipëri!
Politika duhet të mësojë të respektojë dhe të ndahet një herë e mirë nga përcarja. Solidariteti në këto momente të vështira duhet të jetë pjesë e historisë së këtij kombi, për të ndarë politikën nga krimi, vulgariteti, abuzimi dhe deliri!
Ky vend e ka të ardhmen drejt europës, askush nuk e devijon dot këtë destinacion final. Do të mjaftonte vetëm pak maturi politike për ta bërë këtë realitet!
