Nicola Kalinic është përforcimi i radhës i Milanit në këtë hapësirë të merkatos.
“Telenovela” e cila nisi që në muaji qershor u mbyll me fund të lumtur dhe sulmuesi kroat do të jetë të hënën në Milano për t’iu nënshtruar testeve mjekësore, një ritual ky që i paraprin firmës mbi kontratë.
Klubi kuqezi ka gjetur akordin me Fiorentinën. Formula ku dy palët janë dakordësuar është ajo e huazimit me detyrim blerjeje edicionin tjetër. Milani do të kaloj në llogarinë e klubit “vjollcë” 5 milion euro menjëherë , ndërsa 20 të tjera do të depozitohen në verën e vitit 2018.
Kroati dëshironte me ngulm transferimin tek 7 herë kampionët e Evropës, aq sa ditët e fundit nuk ishte paraqitur në stërvitje me Fiorentinën.
Sulmuesi 29-vjeçar ishte një nga futbollistët e kërkuar nga trajneri Montella, dëshirë që iu plotësua nga pronarët e rinj të Milanit. Kalinic është afrimi numër 11-të i këtij sesioni të merkatos për kuqezinjtë.
Ish-lojtari i Dnipropetrovskit kompleton repartin e avancuar të 18 herë kampionëve të Italisë, megjithëse drejtuesit nuk përjashtojnë edhe një goditje tjetër, ku në horizont mbetet një ish-milanist si Pierre Emerick Aubameyang, një transferim që nuk do të jetë i thjeshtë.
Të papërshkrueshme duken pistat Belotti dhe Diego Costa. Për të parin Torino kërkon shumë, ndërsa braziliano-spanjolli dëshiron vetëm Atleticon e Madridit.
