Ka përfunduar takimi i kreut të Partisë Demokratike me aleatët e tij. Duke folur për kamerat pas përfundimit të mbledhjes, Basha tha se Rama nuk është më kryeministër i shqiptarëve, dhe se vendimi i bindet urdhrit të qytetarëve për ta larguar Ramën nga qeverisja.
“Opozita ka marrë një vendim për t’iu bindur urdhrit të qytetarëve shqiptarë në protestën e 16 shkurtit. të tjerat janë budallallëqe për të devijuar të vërtetën. E vërteta është se Rama nuk është më kryeministër i shqiptarëve, është kapur duke vjedhur zgjedhjet. Parlamenti nuk është më legjitim, është ekonomia, kriza sociale, migracioni që janë disa nga arsyet pse Rama duhet të largohet. Pasi është kapur duke vjedhur 30 mln euro te unaza, askush nuk e kupton pse nuk shkon në burg. Ky është një shtet i kapur nga krimi. S’është shteti që shqiptarët duan apo meritojnë”, tha Basha.
Kreu i Partisë Demokristiane, Nard Ndoka tha se është momenti që Rama të reflektojë:
“Qytetarët folën qartë edhe për mandatin e kryeministrit, i cili është kapur duke vjedhur zgjedhjet. Është momenti i reflektimit të Ramës jo vetëm për mandatin si deputet, por edhe si kryeministër. Nëse nuk e lexon sic duhet, është detyra jonë t’i tregojmë se si duhet të largohet”, tha Ndoka.
