Kreu i Partisë Demokratike është takuar me ambasadorin amerikan, Donald Lu, një ditë pas rrëzimit të kërkesës së Prokurorisë së Krimeve të Rënda për arrestimin e Saimir Tahirit.
Takimi mes palëve ka përfunduar para pak minutash, ndërsa në fokus është çështja e Tahirit, i cili akuzohet si i përfshirë në trafikun e lëndëve narkotike.
Por, sot ambasadori Lu dha një mesazh lidhur me rastin e Tahirit, teksa tha se është me rëndësi që të zbulohet e vërteta.
Ndërkohë, Rama e falendëroi Lu-në për qëndrimin e tij, teksa u fokusua tek përmendja e “gjyqeve komuniste”, kurse opozita te shprehja “askush nuk duhet të jetë mbi ligjin”.
Fjalimi i plotë i Lu-së lidhur me çështjen Tahiri:
Më lejoni t’ju them dy fjalë lidhur me polemikat aktuale lidhur me ish ministrin e Brendshëm Saimir Tahiri.
Të gjithë ju jeni duke parë të shkruhet historia në këtë vend. Ajo që dini është se në komunizëm Shqipëria kishte problemin e turpshëm të udhëheqësve komunistë që dërgonin njerëz të pafajshëm në burgjet më të tmerrshme, në Spaç, Burrel e Qafë Krrabë.
Në 27 vitet e tjera ky vend është përballur me problemin e turpshëm të politikanëve të fuqishëm nga e djathta dhe nga e majta që kanë kryer krime të tmerrshme dhe i kanë shpëtuar drejtësisë pa pushim.
Nuk do të ishte e përshtatshme për mua të them nëse Saimir Tahiri është i pafajshëm apo jo, por është jashtëzakonisht e rëndësishme që ju si drejtues të shoqërisë civile dhe ju si të rinj, qytetarë të Shqipërisë të zbuloni të vërtetën.
E drejta për të ditur të vërtetën nuk i përket asnjë partive politike. I përket qytetarëve të Shqipërisë.
Askush nuk duhet të jetë mbi ligjin. Ju nuk jeni gjyqtarë apo prokurorë por jeni njerëz që votoni. I dhatë besimin tuaj këtij personi si anëtar i Kuvendit dhe ministër i lartë i Kabinetit.
Është përgjegjësi e juaj që publiku të kërkojë të dijë të vërtetën për këtë çështje. Nëse është i pafajshëm njerëzit duhet ta dinë këtë, nëse është fajtor ai duhet të përballet me drejtësinë.
